ILIK tapersersorteqarneq

ILIK tapersersorteqarneq 

ILIK kalaallinut København-imut nuuttunut inuttut atugaqarnikkut isumagisassanullu nalinginnaasunut ikiortissamik pisariaqartitsisunut saaffiginnittuuvoq – inuit taakku Danmark-imi pitsaasumik inuuneqalernissaminnut nammineerlutik aallussillutik akisussaaffimmik tigusinissamut piumassuseqartuussapput.

Kalaallit inuiaqatigiinnut dansk-inut akuulerumasut ikiorneqarsinnaanissaasa neqeroorutiginissaa ILIK- iup pingaartippaa. Kalaaliuguit dansk-isut innuttaassuseqarlutit inunngorsimasuuvutit aammalu dansk-it pisinnaatitaaffiisa assinginik peqarlutit. Taamaattoq Danmark-imi pissutsit amerlasuut Kalaallit Nunaanninngaanniit aallaanerusarput. Danmark-imut nuunneq imaannaanngitsuusinnaasarpoq.

Pitsaasumik aallartinnissannut ikiornissat ILIK- iup siunertaraa.

Danmark-imi aalajangersimasumik imaluunniit ukiut arlalialuinnaat najugaqassanersutit matumani apeqqutaanngilaq. Isumaqaruit ILIK ilinnut ikiuutaasinnaasoq, tapersersorteqalernissat pillugu saaffiginninnissannut tikilluaqqusaavutit.


Tapersersorteqarnermik aaqqissuussineq
København-imi inuunerilikkannut nutaamut iserninni tapersersortivit isumagisassannik nalinginnaasunik ikiorsinnaavaatit. Tapersersorti nammineq piumassutsiminik sulisuuvoq, taamaallaallu tapersersuinermigut, siunnersuinermigut ilitsersuinermigullu ikiorsinnaallutit. Taamaammat illit nammineq aamma aallussinissannut piumassuseqartariaqarputit ikiuullu ILIK-iup neqeroorutaa atorluarlugu imminut isumaginissat ilinniartussaallugu. Aallaavittut isigalugu tapersersorterisat qaammatini pingasuni ilinnut attaveqartussaavoq. Tamatuma kingorna illoqarfik annertuumik ilikkareersimassavat inunnillu attaveqarfeqalersimassallutit, nammineerlutit inuuninnik ingerlatsisinnaalersimassallutit.

Aalajangersimasumik sualuit nalinginnaasut soorlu København-ip ilisaritinneranik tapersersortivit ikiussavaatit. Illoqarfik ornigarneqarluartartunit takornariartarfiusut soorlu Tivoli, Strøget aamma Nyhavn-imit allaasunik allarpassuarnik peqarpoq. Takusassat toqqoqqasut aamma anersaartorfiusinnaasut nassaarinissaannut illoqarfiup ilisimaarilluarnissaanik piumasaqaateqarput. Taamaammat illoqarfiup ilikkarluarnissaanut tapersersortivit ikiussavaatit. Assersuutip aappaa tassaasinnaavoq, Danmark-imi pisortat angallassissutaasa atorsinnaalernissaannut tapersersortivit ikiorsinnaammatit.


Inunnut inunnik attaveqarfiusinnaasut
Tapersortitut aaqqissuussinerup isumagisassanik nalinginnaasunik ikiuinerata saniatigut, kalaallinik maani najugaqartunik allanik ilikkagaqarnissannut periarfissaqarputit, taamaalillutit Danmark-imi inuttut inunnik attaveqarfeqalersinnaagavit.

Inuttut illit aamma tapersersortivit attaveqarfigisinnaasaat assersuutigalugu tassaasinnaavoq filmeriarneq, cafe-liarneq, nereqatigiinneq imaluunniit sunngiffimmi sammisanik inuttut sammisaqarfissamik nassaarniarneq, tassani inunnik allanik naapitaqarsinnaavutit attaveqaatissannillu pilersitsillutit. Aamma oqarasuaatikkut attaveqarnerit pisinnaapput, qanoq ingerlanersutit tusarniaaffiginninnerusut, taamaalilluta piffissami siullermi Danmark-imut nuunnerup kingorna kiserliornissaq angerlarsilernissarlu pinngitsoortissinnaavarput.

ILIK sapinngisamik piaartumik attaveqarfigineqarusuppoq. Misilittakkat takutippaat piffissaq siulleq Danmark-imiinneq ajornartorsiorfiunerpaasartoq. København-imut nuunnissat eqqarsaatersuutigigukku, aallarnissat sioqqullugu ILIK-imut aamma attaveqarsinnaavutit, taamaalillutit aallaqqaataaniit ikiorneqarsinnaaniassagavit.

ILIK aputitut alliartortutut sanarfisaavoq, neriuutaavorlu illit nammineq kingusinnerusukkut inunnut allanut ikiortissamik pisariaqartitsisunut tapersersortiujumallutit nalunaarumaartutit.


Malugiuk
ILIK tapersersortitut aaqqissuussineq taamaallaat København-imi neqeroorutaavoq. Danmark-imi sumiiffimmut allamut nuussaguit, Kalaallit Illuat qaninnerusat attaveqarfigissagit innersuussutaavoq. Kalaallit Illui inissisimapput ukunani København, Aalborg, Århus aamma Odense.


Ilik tapersersortitut aaqqissuussamik apeqqutissaqaruvit uunga saaffiginnissinnaavutit:

Mille Schiermacher
Email: ms@sumut.dk
Telefon +45 33381585


Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl