Film-iliornermik ingerlatsinermut tapiissutinik qinnuteqarit

Film-iliornermik ingerlatsinermut tapiissutinik qinnuteqarit 

Film-iliorneq akisusinnaagajuttarpoq – tamanna piviusulersaarutinik aamma takorluukkanik film-iliornermut atuuppoq. Kulturikkut suliniuteqarneq Namminersorlutik Oqartussat tapersersorneqassasoq kissaatigimmassuk, matumani Kalaallit Nunaanni film-iliortarneq ilanngullugu, film-iliornissamut tapiissutinik Namminersorlutik Oqartussanut qinnuteqarnissamut periarfissaqarputit.

Namminersorlutik Oqartussat pingaarnertut kalaallit film-iliaannut tapiissuteqartarput makkununnga tunngasunut
  • takorluukkersaarutinut
  • piviusulersaarusiat, eqqumiitsuliortutut immikkut ersersitsisut pingaarnerutillugit
  • nalinginnaasumik piviusulersaarusiat

Qinnuteqarneq
Film-iliornissamik suliniummut tapiiffigineqarnissaq qinnuteqaatiginiarukku, qinnuteqarnermi immersugassaq immersussavat.

Filmiliornermut qinnuteqarnermi immersuiffissiaq

Qinnuteqaammut aningaasanut missingersuusiaq immersugassaq (excel dokument)
Qinnuteqaammut aningaasanut missingersuusiaq immersugassaq (pdf-fil dokument)

Qinnuteqaammut ilanngussassat suut ilanngutissaneritit qinnuteqaatitut immersugassami takusinnaavatit.

Qinnuteqaatit ilanngussanik ilaqartoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiutissavat. E-mail-ikkut imaluunniit allakkatigut nassiussinnaavat. E-mail: ikiin@nanoq.gl

Fax atorlugu qinnuteqaat nassiussinnaanngilat.

Qinnuteqarnissamut killiliussat tassaapput 1. februar, 1. maj aamma 1. september.

Qinnuteqaativit inaarlugu suliarineqarnissaa sivikinnerpaamik sapaatit akunnerinik 8-inik sivisussuseqarnissaa naatsorsuutigissavat. Taamaammat aningaasat atornissaat sioqqullugu apeqqutigisinnaasavit qulaajaaffigisimanissaat isumagisariaqarpat piffissaalluarallartillugulu tapiiffigineqarnissamik qinnuteqarlutit.

Qinnuteqarnermi piffissaliussaq kingulleq eqquutsinngikkukku imaluunniit ilanngussassat pisariaqartut ilanngussimanngikkukkit, nalinginnaasumik itigartinneqassaatit.

Paasissutissat
Tapiissutitut aningaasaliissutinik pissarsisimaguit, Naalakkersuisoqarfimmut naatsorsuutinik tunniussinissamut pisussaaffeqarputit, taassumalu siunertamut tapiissutit atorsimaneritit nalunaarsussavaa. Aningaasat utertillugit tunniutissavatit imaattoqarsimappat:
  • Sinneqartooruteqarsimaguit
  • Siunertamut aningaasat atorsimanngikkukkit

Malugiuk
Kulturikkut tapiissuteqartarnermi aaqqissuussanit arlalinnit suliniummut ataatsimut tapiiffigineqarnissamik qinnuteqarsinnaavutit. Allaaserisani attuumassuteqartuni tamanna pillugu annertunerusumik atuagaqarsinnaavutit.
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl