Tips- aamma lotto-mit aningaasaliissutit - siunertanut tamanut iluaqutaasussanut (pulje C)

Nalinginnaasumik paasissutissiineq 

Tips-eraanni, Lotto-raanni imaluunniit Danske Spil-imi allarpassuarnik eqquiniaanermi sinneqartoorutit siunertanut ajunngitsunut assigiinngitsunut tunniunneqartarput. Aningaasat Danske Spil-imeersut Tips- aamma Lotto-mit aningaasaliissutitut taaneqartartut pulje-nut pingasunut immikkoortiterlugit agguaanneqartarput, tassunga ilaalluni tamanut iluaqutissanngortitassanik suliniutit, pulje C. Inuit ataasiakkaat peqatigiiffiillu pulje C aqqutigalugu tapiiffigineqarnissamik qinnuteqarsinnaapput.

Pulje C-mit tapiissuteqariaatsinit marlunnit qinnuteqartoqarsinnaavoq:

Suliniutinut aningaasaliissutit:
• Suliniutinut tapiissutinut ilaapput suliniutinut qinnuteqarfissatut killissarititaasup kingorna aallartinneqartussanut aalajangersimasunut piffissaa killilikkanut tapiissutit

Ingerlatsinermut tapiissutit:
• Ingerlatsinermut tapiissutinut ilaapput ingerlatsinermut aningaasartuutit ilaannut assersuutigalugu sulisunut, ininut, allaffinnut paasissutissiinermut atortunut siulersuisut sulinerannut (taamaattoq siulersuisut ilaasortaasa aningaasarsiarinngisaannut) tapiissutit

Piumasaqaatit 

Suliniutinut aningaasaliissutit
• Suliniutinut tapiissutit Kalaallit Nunaanni aalajangersimasumik najugalinnit kikkunnilluunniit qinnutigineqarsinnaapput
• Peqatigiiffiugussi kattuffiugussiluunniit ilaasortat akiliuteqartartut ikinnerpaamik 10-ussapput

Ingerlatsinermut tapiissutit
• ingerlatsinermut tapiissutit nuna tamakkerlugu peqatigiiffinnit kattuffinnilluunniit ikinnerpaamik 10-inik ilaasortaqartunit Kalaallit Nunaannilu angerlarsimaffeqartunit qinnuteqarfigineqarsinnaapput
• ingerlatsinermut tapiissutit aqqutigalugit annerpaamik ukioq ataaseq atugassanik aningaasaliisoqarsinnaavoq
• ukiukkaartumik qinnuteqarfigineqaqqissinnaavoq

Naalakkersuisut 1. november 2013-iminngaanniit isiginnaartitsinermut tunngasunut atatillugu pingaarnersiuipput.
Tamanna ima isumaqarpoq:
• Suliniutinut qinnuteqarnermut 200.000 killigitinneqarpoq, kiisalu suliniutinut ataasiakkaanut tunisassiornernut angalallunilu aliikkusersuiartornernut isiginnaartitsinermut tunngasunut attuumassuteqanngitsunut aningaasartuutit annerpaamik 75%-iinut killilerneqarsimallutik

Isiginnaartitsinermut tunngatillugu immikkut piumasaqaatigineqartut marluusut eqqaassanngikkaanni Pulje C-imi piumasaqaatit qinnuteqartunut tamanut atuutsinneqarput.

Makku tapiiffigineqarsinnaanngillat:
1. Tamanut iluaqutaasussamik siunertanut inatsisitigut aalajangersakkat, tak. § 2
2. Sulinngiffeqarluni angalanerit, paasisassarsiorluni angalanerit, ilisimasassarsiornerit ilinniarnerillu
3. Angalanerit pikkorissarnerillu sulisitsumit akilerneqartussatut ilimagineqartut
4. Nipilersuutinik, hardware-nik aamma software-nik, atortussanik sakkussanillu pisinerit
5. Pinnattaassat
6. Nutaanik sanaartornerit nutarterinerillu
7. Niuernermut atasumik nioqqutissianut, atuakkanik naqiterineq pinnagu, taamaattoq tak. nr. 15
8. Ingerlatanut, qinnuteqartup nalinginnaasumik missingersuutaasa iluanni akilerneqarsinnaasutut naatsorsuutigineqartunut
9. Ingerlatanut, inatsit alla naapertorlugu qinnuteqartumut isumagisassaatitaareersunut
10. Ingerlatanut, qinnuteqarnissamut killigititap nallernerani aallartinneqareersimasunut
11. Amigartoorutinut matussutissat
12. Nittartakkanik pilersitsinermut ingerlatsinermullu
13. Aaqqissuussinernut imaluunniit aaqqissuussinerit ilaannut, ingerlatsinerup ilaatut immiaaqqanik, viinninik imaluunniit imigassamik sassaalliinertalinnut, imaluunniit ingerlatamut atatillugu imigassanik tuniniaaffiusunut
14. Aningaasanik katersuiniarnerit
15. Qinnuteqartup nammineq naqiterivianit saqqummersitanut
16. Saqqummersitseqqinnernut, atuakkat cd-llu ilanngullugit

Malugiuk
Aaqqissuussinernut aaqqissuussalluunniit ilaanni immiaaqqanik, viinninik imigassanillu tuniniaaffiusussanut tapiissuteqartoqarsinnaanngilaq aammattaaq imigassamik sassaanertallit.

Qinnuteqarfissatut killissarititamit sivisunerpaamik ukioq ataaseq sivisussusilimmik tapiissuteqatoqarsinnaavoq.

Tapiissutigineqartut annertussusaat 

Suliniutinut aningaasaliissutit:
• Missingersuutigineqartut 75 %-ii angullugit tapiissuteqartoqarsinnaavoq, taamaattorli annertunerpaamik 200.000 kr.-inik

Ingerlatsinermut tapissutit:
• annertunerpaamik ukiumut 90.000 kr.-it

Qinnuteqartoqartillugu malittarisassat 

Suliniutinut tapiissutinik aamma ingerlatsinermut tapiissutinik qinnuteqaatit tamarmik immikkut suliarineqarlutik nassiunneqassapput.
Tapiissutinik qinnuteqaatip imarissavai, ingerlatassap tapiiffigeqqullugu qinnutigisap allaaserinera, tamatumunnga ilanngullugit suliniutinut tapiissutit imaluunniit ingerlatsinermut tapiissutit pineqarnersut.

Piumasaqaatit allat:
• missingersuut ilanngullugu nassiunneqassaaq
• suliniutigineqartup aningaasalersornissaanut pilersaarut ilanngullugu nassiunneqassaaq

Qinnuteqaatini peqatigiiffinneersuni aamma kattuffinneersuni makku ilanngunneqassapputtaaq:
• maleruagassat akuerisat
• ilaasortanut akiliisartunut uppernarsaat
• ukiumoortumik naatsorsuutit kingulliit

Suliniutinut tapiissutisinissamut qinnuteqarnermi pissutsit immikkuullarissut:
• suliniutinut tapiissutit, suliniutinut qinnuteqarnermiit ukiut tallimat iluanni naammassineqartussanut tunniunneqarsinnaapput
• suliniutip allaaserinera naapertorlugu inunnit suliniutip piviusunngortinnissaanut pingaaruteqartunit peqataaniarluni akuersissutinut uppernarsaatit
suliniutip allaaserinera naapertorlugu init atortullu atorneqartussat atorneqarsinnaanerannut uppernarsaatit

Qinnuteqarneq 

Pulje C aqqutigalugu suliniummut ingerlatsinermulluunniit tapiissutinik qinnuteqarniaruit/-russi qinnuteqarnissamut immersugassaq immersorneqassaaq.

Suliniummut tapiissutit pulje C (word-inngorlugu)
Suliniummut tapiissutit pulje C (pdf-fil-inngorlugu)

Pulje C peqatigiiffinnut kattuffinnut ingerlatsinissamut tapiissutit

Qinnuteqarnissamut immersugassamut missingersuut immersugassaq (excel-inngorlugu)
Qinnuteqarnissamut immersugassamut missingersuut immersugassaq (pdf-fil-inngorlugu)

Qinnuteqaat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiunneqassaaq.

Malugiuk
Qinnuteqarnissamut immersugassaq qarasaasiakkut skrivemaskinaluunniit atorlugu immersorneqarsimassammat.
Tapiiffigineqarnissamik qinnuteqaatissinni suliniutigineqartut imaluunniit qinnuteqarfissat tamaasa immikkut qinnuteqarfigissavasi.

Maluginiarneqassaaq missingersuutinut, naatsorsuutinut kukkunersiuisarnermullu tunngatillugu immikkut piumasaqaateqartoqarmat.

Qinnuteqartussanut piumasaqaatit uani atuarsinnaavatit.

Ingerlatseriaaseq 

Qinnuteqaativit minnerpaamik sapaatit akunneri 8-it atorlugit suliarineqartariaqarnissaa naatsorsuutigissavat. Taamaattumik qinnuteqaatinnut tunngatillugu apeqquteqarfigineqarnissat naatsorsuutigissavat aammalu aningaasanik atuinissaq eqqarsaatigalugu qinnuteqaativit piffissaagallartillugu nassiunnissaa isumagissavat.

Qinnuteqaammut tunngatillugu apeqqutissaqassaguit Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut saaffiginnissinnaavutit.

Naliliineq
Suliniutinut aningaasaliissutit:
• Suliniummut tapiiffigineqarsimaguit nalilersuinermi immersugassaq immersussavat

Nalilersuillunilu immersugassaq aaqqissuussap tapiiffigineqartup naammassineranit qaammatit marluk qaangiutsinnagit Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiutissavat.

Allannguineq 

Suliniutinut aningaasaliissutit
Tapiissutit akuersissutigineqartut siunertanut ingerlatsinernullu tapiiffigeqqullugit qinnutigineqartunit allaanernut atorneqarsinnaanngillat. Suliniummut tapiissutinik pissarsisimaguit suliniullu allanngortinneqarsimappat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut saaffiginnissaatit.

Qinnuteqarnissamut killiliussat 

Suliniutinut aningaasaliissutit
Qinnuteqarnissamut killissarititat tassaapput 15. februar, 15. april, 15. september aamma 15. november.

Ingerlatsinermut tapiissutit
Qinnuteqarnissamut killissarititaq tassaavoq 1. december.

Qinnuteqaatisi qinnuteqarnissamut ullussarititaq eqqorlugu kingusinnerpaamik tiguneqarsimassapput.

Naammagittaalliuuteqarneq 

Sulianik suliarinnittarneq pillugu inatsit naapertorlugu aalajangigaq ingerlateqqissinnaavat:

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik
Postbox 1029
3900 Nuuk
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl