Tips-ernermit Lotto-rnermillu aningaasat – Nalinginnaasumik paasissutissiineq

Tips-ernermit Lotto-rnermillu aningaasat – Nalinginnaasumik paasissutissiineq 

Tips-ersimagaanni, lotto-rsimagaanni imaluunniit pinnguaatinik allanik Dansk Tipstjeneste-meersunik pinnguarsimagaanni, assersuutigalugu kiliortortakkanik assigiinngitsorpassuarnik, taava sinneqartoorutit pitsaasumik siunertaqartumik siunertanut assigiinngitsunut atorneqartarput. Aningaasat Dansk Tipstjeneste-meersut aamma taaneqartarput Tips-ernermit Lotto-rnermillu aningaasat, taakkulu aningaasaliissutinut pingasunut agguataarneqartarput:
  • Aningaasaliissutit A-t, tassanngaanniit timersornernut tamanit peqataaffigineqarsinnaasunut tapiissutit matumani innarluutillit utoqqaallu timersorneri ilanngullugit taamatuttaaq piukkunnaatillit pikkorinnerillu timersornerannut tapiissutit qinnuteqaatigineqarsinnaapput. Aningaasat timersoqatigiiffinnit qinnuteqaatigineqarsinnaapput Kalaallit Nunaannilu timersortartut kattuffiannit aamma Elite Sport Greenland-imit agguaanneqartarlutik
  • Aningaasaliissutit B-t, tassanngaanniit meeqqanut inuusuttunullu timersorneq pinnagu suliniuteqarfigineqarnerannut tapiissutit qinnuteqaatigineqarsinnaapput. Tapiissutit meeqqat inuusuttullu peqatigiiffiinit tamanit SORLAK aqqutigalugu qinnuteqaatigineqarsinnaapput
  • Aningaasaliissutit C-t, tassanngaanniit tamanut iluaqutaasussanik siunertanut matumani kulturimut tunngatillugu siunertanut, inunnik qaammarsaanermut siunertanut, nappaatinik akiuiniarnermut pinaveersaartitsinermullu siunertanut, inooqatigiinnermut tunngasunut siunertanut, asimiititsinissanik siunertanut aamma tamanut iluaqutaasussanik ilisimatusarniarluni siunertanut ilanngullugit, tapiiffigineqarnissaat pillugu qinnuteqartoqarsinnaavoq

Timersoqatigiiffiit aamma meeqqanut inuusuttunullu timersorneq pinnagu suliniaqatigiiffiit, aningaasaliissutinit A-nit aamma B-init tapiiffigineqarnissamik qinnuteqarnissamut periarfissaqarput. Suliniaqatigiiffiit taakku aningaasaliissutit C-t aqqutigalugit sammisaqartitsinernut, aningaasaliissutit A-t aamma B-t aqqutigalugit tapiissuteqarfigineqartartunut piumasaqaatit tamakkiisumik ilaannakuusumilluunniit avataaniittunut, tapiissutinik qinnuteqarnissamut aamma periarfissaqarput.

Inuit ataasiakkaat aamma suliniaqatigiiffiit allat aningaasaliissutinit C-nit tapiissutinik taamaallaat qinnuteqarsinnaapput.


Malugiuk
Qinnuteqaativit inaarlugu suliarineqarnissaata tungaanut sivikinnerpaamik sapaatit akunneri arfineq-pingasut (8) ingerlanissaat naatsorsuutigissavat. Taamaammat aningaasat atornissaat sioqqullugu apeqqutigerusussinnaasavit qulaajaaffigisimanissaat isumagalugu piffissaalluarallartillugulu qinnuteqassagavit.

Missingersuutinut, naatsorsuutinut aamma kukkunersiuisoqarnermut piumasaqaatit immikkut ittut aamma eqqumaffigissavatit.

Piumasaqaatit pillugit annertunerusumik uani atuarsinnaavasi

Aningaasaliissutinit C-nit tapiissutit qanoq ilillutit qinnuteqaatigisinnaaneritit, allaaserisani attuumassutilinni annertunerusumik atuarsinnaavatit.

Allaaserisat attuumassutillit

Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl