Nunani allani napparsimalernermi ikiorserneqarneq – Danmark-imi aamma Savalimmiunilu

Nunani allani napparsimalernermi ikiorserneqarneq – Danmark-imi aamma Savalimmiunilu 

Danmark aamma Savalimmiut, nunani taakkunaniikkallarnermi napparsimalernermi ikiorneqarnissaq pillugu Kalaallit Nunaata isumaqatigiissusiorfigisimavai. Nunani allaniikkallarneq tassaatinneqarpoq takornariarluni angalaneq, tikeraarneq najugaqarnerillu taamaaqataat, qaammatit arfinillit inorlugit sivisussuseqartoq.

Kalaallit Nunaata avataani nunani allani napparsimanermi ikiorneqarnissamut maleruagassat assigiinngitsorujussuupput. Taamaammat napparsimaleraluaruit ikiorserneqarsinnaanersutit aamma ikiorsiissutit suut nunami tikitassanni pisinnaaneritit Danmark-imut aamma Savalimmiunut angalanissat sioqqullugu misissussallugit pingaaruteqarluinnarpoq.


Angalanermut sillimmaserneq
Nunani allani napparsimanermi nakorsarneqarnermut nakorsaatinullu imaluunniit Kalaallit Nunaannut angerlamut angalanermut aningaasartuutit peqqinnissaqarfimmit utertinneqarneq ajorput. Taamaammat angalanermut sillimmasernissat kaammattuutigineqarpoq, ilaatigut aningaasartuutigisanik matussusiisartumik, ima pisoqarneranut atatillugu

  • napparsimaleriataarnermi
  • nakorsarneqarnermi
  • napparsimmavimmi uninnganermi
  • nakorsaatinut
  • angerlamut angalanermi

Pisinnaatitaaffiit
Inuit Kalaallit Nunaanni najugaqartut, nunap angalaffigisap nammineq innuttaanut atugassarititat assinginik pisinnaatitaapput. Tamanna isumaqarpoq napparsimaleriataarnermi imaluunniit nappaatigisap ajorseriasaarnerani, ajoqusernermi assingusumilluunniit pisoqarnerani sullinneqarnissamut pisinnaatitaasutit. Nakorsarneqarnernut pinasuartuunngitsunut aningaasartuutit tamakkerlugit illit nammineq akilertussaavatit. Ima tamanna paasineqassaaq, tallit napisimagukku nakorsiartarfiliartariaqarlutillu, tamanna akeqanngilaq. Paarlattuanik kigutivit putoqarnera pissutigalugu kigutit nakorsaannukartariaqaruit, suliaritinnerit akilertissinnaanngilat.

Nunami allamiikkallarnerup nalaani napparsimaleriataarnermi imaluunniit ataavartumik nappaatigeriikkap ajorseriarnerani, ajoqusernermi assingusumilluunniit pisoqarnerani, pisinnaatitaavutit makkununnga:

Kommunimi najugaqarfigigallakkanni akeqanngitsumik napparsimavimmi nakorsarneqarneq.

Nakorsamit akeqanngitsumik ikiorserneqarneq, Danmark-imi gruppe 1-imi sillimmasikkat, taamatullu Savalimmiuni inuit allattorsimaffiannut nalunaarsimasunut atugassarititaasut assinginik. Nakorsaq akiliuteqartoqarnissaanik piumasaqarpat, akiliutigisatit Danmark-imi kommunip najugaqarfigigallakkavit sygesikringskontor-ianit kingorna utertissinnaavatit. Savalimmiuni sumiiffigisanni sygekasse-mut ullut 14-it qaangiutsinnagit saaffiginnissaatit.

Nakorsap innersuussineratigut nakorsaatigeqqusanut tapiissutit. Danmark-imi Savalimmiunilu innuttaasunut tapiissutit assinginik pisinnaavutit. Pisiarineranni akiata aamma tapiissutit assigiinngissutaat nammineerlutit akilissavat.

Pinartumik kigutileritinnermut tapiissutit. Danmark-imi Savalimmiunilu innuttaasut tapiissutisisarnerisa taamaaqataannik tapiissutisissaatit. Sinneri nammineq akilissavatit. Maluginiartariaqarpallu ”pinartumik” oqariartaaseq, Danmark-imi Savalimmiunilu oqartussaasunit, kigutileritinneq pineqartillugu, assut sukannersumik isigineqartarmat, taamaallaallu assersuutigalugu ikkikkut marniliuunnernut, ilaartortinnerit kigutillu napinerinut, assigisaannillu suliarinninnermut tapiissuteqartoqartarmat. Akilikkap allagartaanik kigutit nakorsaanneersumik takutitsinikkut kommunimi najugarigallakkanni sygesikringskontor-imit aningaasat utertissinnaavatit. Savalimmiuni sumiiffigigallakkanni sygekasse-mut ullut 14-it qaangiutsinnagit saaffiginnissaatit.


Sumi najugaqarnermut uppernarsaat
Siuliini taaneqartunut taamaallaat pisinnaatitaavutit, illit Kalaallit Nunaanni najugaqarnerit uppernarsarsinnaagukku. Taamaammat sumulluunniit aallarniaruit, najukkanni innuttaasunik sullissivimmi imaluunniit nunaqarfiup allaffiani, sumi najugaqarnermut uppernarsaammik pissarsisariaqarputit. Angalaninni sumi najugaqarnermut uppernarsaat tamatigut nassartassavat, taamaanngippat nakorsarneqarnernut tamanut nakorsaatinullu tamakkiisumik akileeqquneqassaatit.

Danmark-imi imaluunniit Savalimmiuni peqqinnissaqarfiit attaveqarfigissagaluarukkit, sumi najugaqarnermut uppernarsaat sygesikring-imut uppernarsaatitut atuuttarpoq.


Malugiuk
Sumi najugaqarnermut uppernarsaat angalatillutit tamatigut nassartassagit, angalanermilu sillimmasernissat innersuussutigineqarpoq.

Kalaallit Nunaanni peqqinnissaqarfiup nittartagaani annertunerusunik paasisaqarsinnaavutit www.peqqik.gl


Allaaserisat attuumassutillit

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl