Nunaminertamik atugassiisarneq – Illuaqqanut immikkut tunngasut

Nunaminertamik atugassiisarneq – Illuaqqanut immikkut tunngasut 

  • Qaasuitsup Kommunia

    Qaasuitsup Kommuniani Sanaartornermut Avatangiisinullu Ingerlatsivimmi illoqarfiit killeqarfiisa iluini kiisalu kommunip nunaqarfiisa killeqarfiisa iluini nunaminertanik agguaasarnerit ingerlatarai. Asimi nunaminertanik atugassanngortitsisarnerit Namminersorlutik Oqartussanit ingerlanneqarallarput - kommunili aqqutigalugu qinnuteqartoqartassaaq.

    Qaasuitsup Kommuniani nunaminertamik atugassinneqarnissamut NunaGIS aqqutigalugu qinnuteqarsinnaavutit.

    Qinnuteqaat qanoq immersorneqarnissaanik ilitsersuut takusinnaavat.

    Qinnuteqaatit atsiorukku aatsaat atuussinnaavoq. Taamaammat qarasaasiakkoortumik atsiortarnerup atuutilernissaata tungaanut qinnuteqaat, taassuma immersorneranut atatillugu, suli atsiortussaatitaavutit. Tamatuma kingorna qinnuteqaat najukkanni innuttaasunik sullissivimmut imaluunniit nunaqarfiup allaffianut tunniutissavat.

    Malugiuk
    NunaGIS.gl aqqutigalugu nunaminertamik atugassinneqarnissamik qinnuteqarsimaguit, akiligassap allagartaa atsiugaq najukkanni innuttaasunik sullissivimmut imaluunniit nunaqarfiup allaffianut kingusinnerpaamik sapaatit akunneri sisamat qaangiutsinnagit nassiulluguluunniit tunniutissavat, akiligassallu allagartaa Sanaartornermut Avatangiisinullu Ingerlatsivimmut ingerlateqqinneqassalluni. Akiligassap allagartaa sapaatit akunneri sisamat qaangiutsinnagit Sanaartornermut Avatangiisinullu Ingerlatsiviup tigusimanngippagu qinnuteqaatit atorunnaarsinneqassaaq.
Illuaqqamik illoqarfiup nunaqarfiulluunniit avataani sanarusukkuit, illuaqqap sananeqarnissaanut nunaminertamik atugassinneqarnissannik kommunimut najukkannut qinnuteqarsinnaavutit.

Periutsit marluk atorlugit kommunimut nunaminertamik atugassinneqarnissamik qinnuteqarsinnaavutit:
  • Nittartagaq www.nunagis.gl aqqutigalugu qinnuteqarsinnaavutit. NunaGIS tassaavoq Kalaallit Nunaat tamakkerlugu nunap assinginik digital-iusunik toqqortaqarfik. Tassani aamma ”Qinnuteqartunut ilitsersuut” nassaarineqarsinnaavoq
  • Imaluunniit najukkanni innuttaasunut sullissivik imaluunniit nunaqarfiup allaffia attaveqarfigisinnaavat, tassanngaanniillu ilitsersorneqarsinnaallutit

Qinnuteqaatinnut ilanngullugu nunap assinga ilaliussaq illuaqqallu titartarnera tunniutissavat. Eqqaamallugu illuaqqap angissusissaa nunallu assingani inissiffissaa eqqortumik nalunaarutigissagakkit. Eqqumaffigalugu tamatumunnga atatillugu piumasaqaatit amerlasinnaammata, soorlu illuaqqamut qaninnermut ungasissusissap minnerpaaffissaa kommunimi pilersaarummi aalajangersarneqarsimasinnaammat. Assersuutigalugu illuaraliat itsarnitsanut, soorlu nunaqarfiusimasunut minnerpaamik 20 meter-inik ungasissuseqartussaavoq.

Najukkani innuttaasunut sullissivimmi imaluunniit nunaqarfiup allaffiani qinnuteqarnissamut ikiorneqarsinnaavutit. Tassani aamma sumiiffimmut, illuaraliornissamut kissaateqarfigisannut nunap assinginik pissarsisinnaavutit.

Malugiuk
Kommune najukkat nunaminertamik atugassinneqarnissamut qinnuteqaativit suliarineranut atatillugu akitsuummik akiliisitsisinnaavoq.

Nunaminertamik atugassinneqarninniit kingusinnerpaamik ukiut marluk qaangiunnerini illuaraq sanareersimassavat.

Illuaqqamik annerusumik sanassaguit, aamma sananermut akuersissummik peqarnissat kommunip piumasarisinnaavaa. Aamma illuaraliornissamut nunaminertamik atugassiinermi kommune allanik piumasaqaateqarsinnaavoq.

Allaaserisat attuumassutillit

Qaasuitsup Kommunia
Postbox 1023
3952 Ilulissat

Oqarasuaat: (+299) 94 78 00
Fax: (+299) 94 25 52
E-mail: qaasuitsup@qaasuitsup.gl
Nittartagaq: http://www.qaasuitsup.gl

Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik
Imaneq 1A - 801
Postboks 1614
3900 Nuuk

Oqarasuaat: (+299) 34 50 00
Fax: (+299) 34 54 10
E-mail: pann@nanoq.gl
Nittartagaq: www.naalakkersuisut.gl