Siusinaartumik pensionisiat pillugit aaqqissuusseqqinneq aallartinneqartoq

Qaasuitsup Kommuniani siusinaartumik pensionisiat pillugit aaqqissuusseqqinneq, 1. juli 2016 atuutilersoq ukiunilu sisamani ingerlasussaq, maannamut piareersarneqareerluni aammalu Majoriami Isumaginnittoqarfimmilu sullissisunik siusinaartumik pensionisiat, piginnaanngorsaaqqiisarneq, pisortanit ikiorsiissutit sullissinermilu suleriutsit assigiinngitsut pillugit ulluni 27. – 30. januar 2017 pikkorissaasoqareernerata kingorna atuutilersitsinissamik suliaqarnissaq aallartisartussanngorpoq.
31. januar 2017

Siusinaartumik pensionisiat pillugit aaqqissuusseqqinnerup malitsigisaanik suliniuteqarnermi maannamut sullissisut nalilersugaat aallaavigalugit qulaajaanerup aallartisarnerani immikkoortiterinermi erserpoq, Qaasuitsup Kommuniani siusinaartumik pensionisiaqartunit 950 missaanniittunit 350 missaanniittut aallaqqaammat sulisinnaassutsimikkut naliliivigineqaqqissasut.  

Aaqqissuusseqqinnermik atuutilersitsinermik suliaqarneq pissaaq piffissami 1. februarimiit 30. april ilanngullugu. Atuutilersitsiniarluni ingerlatsinissani illoqarfinni tamani siusinaartumik pensionisiaqartunik, siunissamik annerusumik minnerusumilluunniit sulisinnaassuseqaleqqissinnaasunik, sulisitsisunillu, namminersortunik pisortallu suliffeqarfiutaannik, qaammarsaalluni ataatsimiisitsinerit ingerlanneqassapput.