Tusagassiutinut nalunaarut

Kommunit tamarmik massakkut NAKUUSAmut meeqqat akuutinneqartarnissaat pillugu isumaqatigiissuteqalerput.
Kommunini kingullerpaallutik ullumikkut Qaasuitsup Kommunia NAKUUSAkkunnik suleqateqalernissaminnik atsiorput, tamanna Meeqqat Isummersorfeqalernerannik atuarfinnilu tamani Nakuusaaraqalernerinnik isumaqarpoq.
7. februar 2017

Ullumi Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoq Sara Olsvig taavalu Qaasuitsup borgmesteria Ole Dorph naapipput NAKUUSAllu Qaasuitsup Kommuniatalu suleqatigiinnissamut isumaqatigiissutsissaat atsiorlugu. Suleqatigiinnissamut isumaqatigiissut suliniutip ”uagut ulluinnarput – uagut niperput” ilagivaa, meeqqat ulluinnarmi, illoqarfigisaminni nunaqarfigisaminniluunniit, inuunerminni aaliangeeqataasinnaanerannut sunniuteqaqataasinnaanerannullu pisinnaatitaaffiinik qulakkeerinninnissamik siunertaqartoq. Isumaqatigiissut naapertorlugu kommunimi Meeqqat Isummersorfeqalissapput atuarfinnilu tamaginni Nakuusaaqqanik pilersitsisoqassalluni.

Qaasuitsup Kommuniata Meeqqat Isummersorfiat 12-nnik ilaasortaaffigineqarpoq taakkuussallutillu kommunimi politikerinut siunnersuuteqartartussat. Atuarfinni isummersoqatigiiffiit, Nakuusaaqqat, atuartunit annernit ilaasortaaffigineqassapput, taakkuussallutillu kommunip iluani meeqqat tamaasa sinnerlugit oqaaseqartartuusussat.

”Suliniut kommuninit tamanit tapersersorneqarluartoq assut uatsinnut ilorrisimaarnarpoq”, NAKUUSAmi suliamik aqutsisoq Najaaraq Møller taamak oqaaseqarpoq nangillunilu, ”Kommunit tamarmik maanna atsiorsimalerneranni oqarsinnaanngorpugut asseqanngitsumik nunatsinni meeqqat sinerissamiittut tamarluinnaasa akuutinneqarnissaannut sinaakkummik peqalerluta. Massakkumiit sinaakkutip taassuma atorluarneqalernissaanut sumiiffinnullu tulluarsarnissaannut sulilluta aallartissinnaanngorpugut.” 2017-ip ingerlanerani NAKUUSAp Qaasuitsumi ilinniartitsisut pikkorissartussaavaat, tamanna illoqarfinni nunaqarfinnilu amerlaqisuni meeqqat sunniuteqaqataasinnaanerannut qulakkeerinnittussaassammat.

Siusinnerusukkut Qeqqata Kommunia, Kommuneqarfik Sermersooq kiisalu Kommuni Kujalleq assigisaanik Naalakkersuisoqarfik isumaqatigiissuteqarfigereerpaat.