Qaasuitsup Kommuniani timmisartuaraq Drone atortoralugu upalungaarsimasut

Qaasuitsup Kommuniata Annaassiniartartutut Upalungaarsimasui Kalaallit Nunaanni upalungaarsimasuni siullersaallutik timmisartuaqqat drone-t sulinermi atugarisussanngorpaat, siullermik ukiuni marlunni misiligutaallartumik* Ilulissani aallartillutik, tamatuma kingorna nalilersorneqassaaq timmisartuaqqat atulernissaat qanoq ineriartortinneqassanersoq.
26. april 2017

Qaasuitsup Kommuniata Annaassiniartartutut Upalungaarsimasuisa 2015-imili nunanit allanit misilittagaasut paasiniaanerillu ingerlatilersimavai, ilaatigut timmisartuaqqanik drone-nik ingerlatsisartut misilittagartuut, qatserisartoqarfiit annaassiniartartoqatigiillu misilittagaat aqqutigalugit, december 2016-imilu timmisartuaqqamut drone-mut timminissamut aqutsisinnaasumik ilinniartitsillunilu allagartartaartitsimalluni drone-millu atuinissamut immikkut akuerineqarsimalluni.

Drone-t silaannakkut angallassinermi aalajangersakkatigut assigiinngitsunik piumasaqaateqarfigineqarput** nalinginnaasumillu mittarfeqarfimmit 5 km iluani, aqquserngit angallaffiit qulaanni, illoqarfiup iluani ajutoorfiullu qulaani atoqqusaanatik. Killilersuinerit taariikkat malillugit nalinginnaasumik drone assersuutigalugu Ilulissani kiisalu annaassiniarnernut atuinissaq ajornarpoq, taamaammat Qaasuitsup Kommuniata Annaassiniartartutut Upalungaarsimasui mittarfimmit, illoqarfiup/najugaqarfiit qulaanni, ajutoorfiit qulaatigut, aqquserngit kiisalu inuit angallattut qulaallugit timminissamut immikkut akuerisaasimavoq.

Qaasuitsup Kommuniata Annaassiniartartutut Upalungaarsimasui maannakkut pigisaqarput drone DJI Inspire 1 suliaqarnerni atugassatut, kiisalu DJI Phantom 4 sungiusaatitut suliaqarnernullu atugassiaq. Drone-t tamarmik Angallannermut Pisortaqarfimmi nalunaarsugaapput piumasaqaatigineqartumillu silaannakkut angallassissutinut sillimmasiissummik sillimmasigaallutik.

DJI Inspire 1 assiliissuserneqarsinnaavoq kissamut malussarissumik, drone-t tamarmik sakkortuunik qaamanilinnik LED-nik qinnguartaasersinnaapput assersuutigalugu piffissani taarsisarfinni apummi tumit, atukkat iginneqarsimasut, sikumi aakkarnerit sumiiffissillugillu qaammaqqusersuisinnaanngorlugit.

Drone-t pisorpassuarni sakkutut pitsaasuupput, ilaatigut sinerissap qanitaani minguttitsinerit, ajoqusersimasut sumiiffissineri, assers. Takornarissat sumiiffitsik taasinnaanngippassuk, periarfeerussanut/tammartajaartunik ujaasinernut, ilaatigut innani sivingasuni sinerissallu qanitaani ujaasinermi ujaasiartortut inugaannut qullartillugit qinerlernermi atorsinnaapput, pinngortitami ikuallattup annertussusaa ikumanerpaaffialu sumiiffissisinnaallugu ”piffiit kissarnerit”, innerullu uniffissai imilersuiffissallu qulaanit takunissaannut, kiisalu isorartussutsit slangenik atugassanik uutortaanermut pumpe-llu qassit atornissaannut naliliinermut atorneqarsinnaallutik.

Ajunaarnersuarni ikuallarujussuarnernilu silaannarmit assit/video atorlugu annaassiniartartut indsatsleder-ii ajutoorfiup angissusaanik aamma atortut inuttallu pisariaqartitat nalilernissaannut iluaqusissavai.

Drone-mik ingerlatsisup drone-p assiliiviatigut malinnaasinnaavoq film-iliorluni assiliisaarlunilu. Naatsorsuutaavoq atortut assilisanik skærm-imut/skærm-ersuarmut toqqaannaq nassitsisinnaasut atulernissaat nakkutilliisutut, assiliisutut indsatsleder-itullu pisut ajutoorfimmi KST-miit malinnaavigisinnaanngussallugit, kiisa DJI Inspire 1 immikkut assiliissummik aqutsissummik pilerniarneqarpoq. Immiussat nalunaarusiornermi, paasiniaanerni uppernarsaatissatut, annaassiniarnerup takussutissaatut kiisalu pinaveersaartitsinernut ilinniartitsinernullu atorneqassapput.

Drone-t ingerlatsisumiit 2000 meter miss. angullugu ungasitsigisumut timmisinnaapput sivisunerpaamillu timminermi 60-80 minutsit batteriimut ataatsimut timmisinnaallutik, kingorna 60 minutsit miss. unikkallarsinnaallutik. Sarfalersuisualli anorip qanoq inneranit, kiassusermit aammalu batterissamaatit uninngaviinit apeqqutaassaaq qanoq sivisutigis-sanersoq. Drone-t atortuilu suli ineriartortinneqarput – ungasinnerusunut piginnaasaallu pitsannerit ujartorneqarlutik drone-t nutaat siunissami saqqummersussat annaassiniartartunut naleqqussakkat saqqummissapput.
Drone atulersinnagu silap pissusaa silassarlu ingerlatsisussap misissortussaavai, NOTAM il.il., taamaammat drone silaannakkut angallassissutitut allatulli anorimit silamillu aporfeqarsinnaavoq.